香辣菜脯

新年前偶然去左一間食餃子的小舖, 佢地成間店都無辣椒油, 只有話自家制的辣椒菜脯, 試過之後覺得幾好味, 不過都唔辣, 所以今早經過街市買餸, 見到雜貨舖有菜脯賣, 又買返D返來屋企自己炒, 睇下好唔好味先!


1) 菜脯- $10蚊! 初試牛刀唔敢買太多....買返來的菜脯先洗一洗, 之後浸佢大約10分鐘, 然後切碎佢, 大小隨自己鐘意.

2) 準備配料: 蒜頭1.5個, 乾葱頭3粒, 指天椒20隻,蝦米醬2湯匙,
蠔油1湯匙 (我覺得用魚露會好D, 個色無咁黑), 糖1湯匙, 鹽1茶匙, 花雕酒1湯匙.

3) 開始炒啦! 白鑊將菜脯烘香, 炒到乾身, 之後盛起

4) 落6湯匙油, 將乾葱同蒜頭爆香, 

再下指天椒 

5) 然後將菜脯一齊落返繼續炒, 最後落蝦米醬同調味料混合炒到所有食材乾身.

6) 熄火放涼, 後放入乾淨的密實樽保存, 最好放入雪櫃, 食時先取出來.

P.S. 餃子店的辣油菜脯只有蒜頭, 菜脯同大量的油浸住, 我想佢應該係將大量的油爆香指天椒, 再加返菜脯去炒, 咁就變左辣椒油菜脯. 大家不妨自己變化下. ^-^ 配返個粉仔超好味!